關於粵謳與招子庸

粵謳是廣東曲藝說唱之一，與木魚、龍舟、南音、板眼被稱為粵調。粵謳起源於珠江一帶的蛋歌和鹹水歌，本來是珠江花舫、妓院妓女唱詠的情歌，後為岸上瞽姬師娘等人的歌唱。

清朝人招子庸在道光元年（1821年）輯《粵謳》一書，粵越同音，所以又叫越謳。《南海縣誌》招子庸傳記曰：“雖巴人下里之曲，亦饒有情韻”，又話詞中“粵東方言別字亦得所改正，不若詰屈聱牙。一時平康北里，譜入聲歌”。

其實，在此之前，也有文人馮詢創作粵謳，但是他並沒有把自己作品出版刊印，後來出任官職后更把所有作品銷毀，所以沒有流傳下來。

粵謳由師娘瞽姬（失明歌妓）所唱，出名的有二妹師娘、英華師娘、李銀嬌師娘等，亦有少數瞽師唱詠時候以琵琶、揚琴伴奏。二妹師娘首創“解心腔”，英華師娘以古腔唱粵嫗聞名，而李銀嬌師娘就留有《桃花扇》一曲錄音傳世。在第二次世界大戰後，懂得唱粵嫗的師娘相繼淡出，粵謳從此失傳。

招子庸作品

《解心事》，招子庸作品，有兩首：

（一）“心各有事，總要解脫為先。心事唔安，解得就瞭然。苦海茫茫多數是命蹇，但向苦中尋樂便是神仙。若系愁苦到不堪，真系惡算，總好過官門地獄更重哀憐。退一步海闊天空就唔使自怨，心能自解，真正系樂境無邊。若系解到唔解得通就講過陰隙過便。唉，凡事檢點，積善心唔險，你睇遠報在來生，近報在目前。”

（二）“心事惡解，都要解到佢分明。解字看得圓通，萬事都盡輕。心事千條就有一千樣病症。總繫心中煩極講不得過人聽。大抵痴字入得症深都系情字染病。唔除痴字就系妙藥都唔靈。花柳場中最易迷卻本性，溫柔鄉里總要自出奇兵。悟破色空方正是樂培，長迷花柳就會墜落愁城。唉，須要自醒，世間無定是楊花性，總系邊一便風來就向一便有情。”

《揀心》，招子庸作品

“世間難搵一條心，得你一條心事我死亦要追尋。一面試佢真心，一面防到佢噤[2]，試到果實真情正好共佢酌斟。噤噤嚇噤到我哋心虛，個個都防到薄倖。就系佢真心來待我，我都要試過兩三勻。我想人客萬千，真嘅都冇一分，嗰啲真情撒散[3]，重慘過大海撈針。況且你會搵真心人亦都會搵，真心人客，你話夠幾個人分。細想緣份各自相投，唔到你着緊。安一嚇本分，各有來由你都切勿羨人。”

《桃花扇》，招子庸作品

“桃花扇，寫首斷腸詞，寫到情深扇都會慘凄。命冇薄得過桃花，情冇薄得過紙。紙上桃花，薄更可知。君呀，你既寫花容，先要曉得花的意思。青春難得，莫誤花時。我想絕世風流都冇乜好持。秋風團扇，怨在深閏。寫出萬葉千花，都為情一個字。唔系你睇侯公子李香君，唔系情重，點得遇合佳期。”

《心心點忿》

《唔系乜靚》

“你唔系乜靚啫，做乜一見我就心傷。想必你未出世就整定銷魂今世惹我斷腸。你系前世種落呢根苗，今世正有花粉孽賬。故此我拚死去尋花，正碰着你呢朵異香。紅粉見盡萬千，唔似得你咁樣。相逢過一面，番去至少有十日思量。捨得死咯敢話死去會番生，我又同你死賬。難為我真正死咯，嗰陣你話冇乜相干，呢會俾個天上跌個落嚟，我亦唔敢去亂想。真真要見諒，莫話粒聲唔出就掉轉心腸。”

《乜得咁廋》，招子庸作品

“乜得你咁瘦，實在可人憐。想必你為著多情惹恨牽。見你弱不勝衣，容貌漸變。勸你把風流兩個字睇破嚇，切勿咁綣纏。相思最會把精神損。你睇痴蝶在花房，夢得咁倒顛。就系恩愛到十分亦唔好咁綣戀。須要打算，莫話只顧風流唔怕命短，問你一身能結得幾個人緣。”

《真正惡做》，招子庸作品

“真正惡做，嬌呀你曉得我苦心無。日夜共你痴埋重慘過利刀。近日見你熟客推完，新客又不到。兩頭唔到岸，好似水共油撈。早知道唔共你住得埋，不若唔相與重好。免使掛腸掛肚，日夕咁心操。勸你的起心肝尋番過好佬，共你還通錢債，免使到處受上期租。河底下雖則系繁華，你見邊一個長好到老。究竟清茶淡飯都系揀過上岸至為高。況且近日火燭咁多，寮口又咁惡做，河廳差役終日系咁嗌嘈嘈。唔信你睇各間寮口部，總系見賒唔見結，白白把手皮撈。就俾你有幾個女都養齊，好似話錢債易做，恐怕一時唔就手就墮落酆都。雖則鴇母近日亦算有幾家系時運好，贖身成幾十個女，重有幾十個未開鋪。想到結局收場未必真系可保。況且百中無一個的境遇實在難遭。你最好撥埋心水搵着地步，唔怕冇路，回頭須及早，好過露面拋頭在水上蒲。”

《生得咁俏》，招子庸作品

“我生得咁俏，怕冇鮮魚來上我釣。今朝挈在手，重系咁尾搖搖。呢回釣竿收起都唔要，縱不是魚水和諧都系命里所招。我想大海茫茫魚亦不少，（你班衰佬）休要亂跳，鐵網都來了，總系一時唔上我釣啫，我就任你海上逍遙。”

《結絲蘿》

“清水燈心煲白果，果然清白怕乜你心多。白紙共薄荷包俾過我，薄情如紙你話奈乜誰何。圓眼沙梨包幾個，眼底共你離開暫且放疏。絲線共花針，你話點穿得眼過。真正系錯，總要同針合線正結得絲蘿。”

《難忍淚》，招子庸作品

“難忍淚，灑濕蓮枝。記得與君聯句在曲欄時。你睇粉牆尚有郎君字，就系共你倚欄相和那首藕花詩。今日花又復開，做乜人隔兩地。未曉你路途安否，總冇信歸期。蓮筆叫我點書呢段長恨句。愁懷寫不盡好似未斷荷絲。今日遺恨在呢處曲欄提起往事。唉，想起就氣。睇住殘荷凋謝咯，我就想到世事難為。”

《點算好》

（一）“點算好？共你相交又怕唔得到老，真情雖有，可惜實事全無。今世共你結下幾段姻緣待等來世正做，你為和尚我做齋姑。唔信你睇紅樓夢上有段鴛鴦譜，嗰個寶玉共佢無緣，所以黛玉得咁孤。佢臨死哭叫四個字，一聲唉，寶玉你好。真正無路可訴，離恨天難補。罷咯不若共你淡交如水，免至話我系薄情奴。”

（二）“點算好，君呀你家貧親又老，八千條路咁就冇一點功勞。虧我流落呢處天涯，家信又不到。君歸南嶺，我苦住京都。長劍雖則有靈，今日未吐。新篁落籜，或者有日插天高。孫山名落朱顏槁。綠柳撩人重慘過利刀。金盡床頭清酒懶做。無物可報，珠淚穿成素。君呀，你去歸條路，替我帶得到家無。”

已故香港典故專欄作家魯金說過，粵謳是不限字數的民歌，好像同是一首《解心事》，第一首隻有一百二十字，第二首就有一百三十七字；所以粵謳歌者，往往透過掌握上下句的句法，就能別出心裁，唱得婉轉而動聽。

有關粵謳的研究包括：冼玉清的《招子庸研究》同《粵謳與晚清政治》、許復琴《招子庸與珠江粵謳》、薛汕《粵謳》，載其所著《書曲散論》、蔡衍棻《粵謳》、區文風《木魚、龍舟、粵謳、南音等廣東民歌被吸收入粵劇音樂的歷史研究》、陳志清《南音粵謳的詞律曲韻》、陳潞《謳聖與香港的關係》、〔日本〕波多野太郎《木魚龍舟南音粵謳》、梁焙熾《南音與粵謳之研究》、招勉之《關於粵謳及其作者的尾巴》......。

《除卻了阿九》，葉茗生作品

“除卻了阿九，重有邊一個及得佢咁銷魂。任得你靚到鬼火咁凄涼，都要讓佢幾分。呢佢兩頰桃花，不用搽脂盪粉。石榴裙下，佈滿不二之臣。講到佢抱起琵琶，就越發唔洗問。唱到關王廟相會，佢重句句咁傾心。銷魂一曲，的是非凡品。鶯喉婉轉，真系盪人魂。知否月不常圓花易落。紅燈夜夜，應該要早覓知心。妹呀，快活風流非長幸。你遇到個真情者，你就要格外留神。凈系替個養母發財，非你本份。我勸你求籤拜佛，應該問番紙自身，因為年紀系會漸高，容貌會漸退，從前恩客會變作陌路之人。妹呢，你性本系咁聰明，你平日系咁謹慎，又知否黃金難買過去左既光陰，所謂樹高千丈又何須問，人無歸結，好極都系閑聞。面對個世界，你慢慢想真，喉就會噎哽。酒壺拈起，眼淚粘喉吞。總之唔得到上街呢，千日都系無倚憑。試問從良個兩個字呀，妹呀，你想透唔曾。你知否多少痴男，為你賤視封侯印，知否情到深時會恨更深，總之花債未完都非福份，休再混，望你脫離苦海，好過我步上青雲。”

《別意》，收於招子庸《粵謳》

“想必緣分已盡，花債都還齊。債還緣盡，故此惹出別慘離凄。唉，我兩個系咁情痴，點估話情不到底，想起從前個種風月哩，好似夢斷魂迷。記得起首共你相交，你妹年紀尚細，個陣傾談心事，怕聽海上鳴雞。只望相與日子咁長，你亦會同妹設計。點想你夫妻情重，不肯帶賤妾回歸，累得我斷梗又好似飄蓬，無所倚系。想到話飄流無定咯，只着要搵的挨依。今日人地話我薄情，唔系都似系。再不估同群咁多姊妹，無個知我心上咁難為。我近日面上桃花，只系憑眼淚洗。唉，君呀，你唔好為我屓屓，知道拗硬個副心腸唔多願，所以你自從聽見話我要去咯，此後你總不開嚟。”